راز بلڙائي: ناليواري شاعر، ناول نويس ۽ ڪهاڻيڪار راز بلڙائيءَ جو اصل نالو عبدالطيف ولد عبدالستار ڪوريجو هو. شاعريءَ ۾ ’راز‘ تخلص ڪتب آڻيندو هو. هن نامور شاعر 12 ڊسمبر 1923ع تي ضلعي ٺٽي جي شهر درويش، تعلقي گھوڙا ٻاريءَ ۾ جنم ورتو. هن عملي زندگيءَ جو آغاز پوليس کاتي ۾ نوڪري اختيار ڪرڻ سان ڪيو ۽ پوءِ استاد ٿيو. شعر ۽ شاعريءَ جو شغل ننڍي هوندي کان ئي هوس. شاعريءَ ۾ سندس استاد محمد زمان طالب الموليٰ ۽ بسمل ٽکڙائي هئا، جن سندس گھڻي رهنمائي ڪئي. راز بلڙائي سنڌي ٻوليءَ جي اهم شاعرن ۾ شمار ٿئي ٿو. هن ڪلام ٿورو سرجيو، پر فني لحاظ کان نهايت سليس ۽ سولي شاعري ڪئي اٿس، بنيادي طرح غزل جو شاعر رهيو، پر نظم به لکندو رهيو. سندس ڪوبه شعري مجموعو شايع نه ٿيو آهي، البت محبوب سروريءَ جي ڪتاب ’يار خاطر‘ ۾ سندس ڪجھه ڪلام شايع ٿيو آهي.
راز بلڙائيءَ جا هيٺيان نثري ڪتاب ڇپيا آهن: ’گناهه‘ (ناول)، ’شرابي‘ (ناول)، ’بک‘، ’بک ۽ بيڪاري‘ (افسانو) ۽ ’گلبدن).
هن پنجاهه ورهين جي ڄمار ۾ 1973ع ۾ وفات ڪئي.
1923.12.12 عيسوي
هن نامور شاعر 12 ڊسمبر 1923ع تي ضلعي ٺٽي جي شهر درويش، تعلقي گھوڙا ٻاريءَ ۾ جنم ورتو.